O #Hackaton Rural COVID-19 premia un proyeuto de Delera

27 May O #Hackaton Rural COVID-19 premia un proyeuto de Delera

A propuesta esfendita en iste hackaton por o nuestro Direutor Executivo, Miguel Martínez Tomey, y que ha otenito ro reconoximiento de El Hueco (entidat promotora d’autividaz de luita cuentra ra espoblazión tals como a feria “Presura”) será desarrollata por a prestichiosa cobadora d’interpresas Bridges for Billions. Iste ye o contenito d’a ideya planteyata por Delera:

Idea: creyar un Rete Economico Rural (RER) compuesto de proveyedors de biens y servizios aposaus en o meyo rural rechistratos en un direutorio con a fin d’enfilar as dezisions de crompa d’interpresas y consumidors finals rurals enta ditos proveyedors. D’atro costau, ístos aberbar d’ofrexer á os suyos cliens rechistratos bella mena d’aventaxa en pre u prestazions.

Problema que resuelve: aduya á mantener o volumen de negozio d’as interpresas rurals endizcando a “crompa rural” por parti d’as interpresas y consumidors rurals, amillorando l’atrautivo d’a suya produzión fren á competidors afincatos en o meyo urbano. Con o tiempo, os chestors d’o rete (una nueva interpresa) pueden desarrollar as suyas potenzialidaz fazelitando ro establimiento de vinclos y mesmo alianzas comerzials estables entre interpresas d’o meyo rural, fizoniando as formulas d’economía colaboradera, organizando crompas coleutivas ta ofrexer biens y servizios en condizions más ventallosas, fidelizando cliens y achuntando atros tanto en o meyo rural como en l’urbano.

Traza de fer-lo: en os zaguers años s’ha chenerau un ecosistema innovador en o meyo rural que ha crexito con rapidez y que se compone de moltiples retes sozials, muitos d’ellos de nivel comarcal u provinzial. Á traviés d’un portal web cudiadosamén conzebito, organizato y chestionato se puede enamplar y potenziar a capazidat de “alcanze” d’os componens interpresarials d’istos retes metendo en valor o suyo potenzial como cheneradoras de mercaus. S’amenistareba presonal y meyos apropiaus ta ra suya mesa en marcha, filando enta o suyo refincamiento como un proyeuto interpresarial.

Benefizio: en establir un sistema de crompa y venda de “preferencia rural” se chenera un fluxo rural-rural de produzión y requesta que aduya á sustener o volumen de negozio drento d’a economía d’as zonas rurals (en muitos aspeutos más vulnerable que o texiu economico d’as zonas urbanas), sin perchudizio d’as dezisions finals de crompa. Aduyareba á acodalar os negozios rurals que enduran agora a crisis d’o COVID-19 pero dimpués de superar-la poderba fer-se servir como ferramienta ta afavorexer a suya competitividat. A propia chestión, diversificazión y espansión d’o RER rebaila ra creyazión d’una interpresa con os suyos puestos de treballo.

Puncha en a imáchen ta escargar a presentazión en PowerPoint