Imo-nos-ne de crompas!

29 May Imo-nos-ne de crompas!

A Fase 2 premite ubrir a o publico toz os comerzios y servizios profesionals asinas que, por qué no aproveitar-ne? O unico que comerzians y cliens emos de fer ye aplicar as precauzions y midas que esbrusamos en iste articlo.

Ta que garra chen no tresbata ni o más chiquet detalle, aquí dixamos o enrastre a o BOE. Puede parixer bella cosa embolicau pero, como ya espliquemos en fablando de bars y restaurans, resulta más senzillo si autuamos ordenatamén en conformidat con istos cuatro prenzipios:

1. Limpieza diaria y contina:

-Joriar o local a ro menos una vegata a o día ro tiempo sufizién ta que s’arrenueve tot l’aire.

-Limpieza y esinfezión d’as instalazions a lo menos dos vegatas en o día: una obligatoriamén en rematar a chornata y atra preferenmén en a meyodíada, en fendo una entrestallata ta limpieza, mantenimiento y remeter. Se zentrará espezialmén en as superfizies de contauto más frecuens: pomos de puertas, tablers, muebles, balagostas, maquinas dispensaderas, solaus, telefonos, colgadors, carros y zestas, chetas y atros, con produtos viruzidas autorizatos por o Menisterio de Sanidat u con deluzions de lexiva a o 50% paratas cada día. Tamién, d’as zonas privatas d’os treballadors: vestugarios, taquillas, escusaus, cozinas y árias d’escanso.

-En os comerzios se revisará a ichiene d’os escusaus ubiertos ta o publico, espezialmén sanitarios, chetas y pomos.

-Dimpués de cada limpieza se disposarán de traza segura toz os materials y equipos de protezión usatos y se lavarán as mans.

2. Cosas que cal meter:

-Dispensadors de chel hidroalcolico u desinfestán como minimo en a dentrada d’o local y en a redolata d’os mercaus u puestos de venda ambulán en a vía publica. Y cusirar que no s’acotolen u s’estropizien!

-Endicazions claras d’o compás de seguridat que han d’alzar entre ellos os cliens, con marcas en o suelo, fitas, cartels y siñals.

-Cartels endicando l’aforo maximo de cada local (que debe determinar-se parando cuenta d’os treballadors) y sistemas ta controlar o suyo recuento y control.

3. Orarios, distanzias y aforos:

-Antimás de l’orario de tancadura ta mantenimiento y limpieza en metat d’a chornata, cal fixar un orario d’atenzión con servizio prioritario ta mayors de 65 años.

-Si se deseya, se pueden establir sistemas de recullita en o estableximiento de produtos alquiritos por telefono u internet sempre que sigan de traza escalonata ta privar ringleras y arrunzatas.

-Tamién se puede establir un sistema de reparto a domizilio preferén ta coleutivos determinatos.

-O tiempo d’estada d’os cliens en os locals debe estar o estrictamén nezesario ta fer as suyas crompas u rezibir o servizio demandato.

-A distanzia minima entre cliens ha d’estar perén de dos metros. En os locals en os que no siga posible mantener ixe compás, nomás se premitirá l’azeso d’un solo clién.

-O compás entre cliens y treballadors tamién ha d’estar de dos metros (tamién en o comerzio a l’aire libre) pero con dos eszezions:

• Puede estar d’un metro si entre ellos esisten elementos de protezión u barrache.
• En servizios que no premitan o mantenimiento d’a distanzia minima como peluquerías, zentros d’estetica u fisioterapia, anque deberá usar-se o equipo de protezión adecuau a o nivel de risque ta protecher a o treballador y a o clién.

-Limitazión de l’aforo d’os locals comerzials a o 40% de l’abitual. Pero atenzión!: en Aragón ye premitito plegar dica o 50%. En o causo de contar con varios solaus, o lumero de cliens que bi aiga en cada una d’ellas ha de alzar a mesma proporzión en tot momento.

-Limitar a una presona (y solo que belatra más si entre ellas ye posible guardar un compar de 2 metros) o uso d’aszensors, en priorizando o uso d’as escaleras.

-Limitar l’azeso a os escusaus a una presona cada vegata, salvo en os causos de presonas que nezesiten asistenzia, en os que podrá achuntar-se un acompañante.

4. Protezión a os treballadors:

-Un mesmo treballador no podrá atender simultaneamén a dos cliens de vez.

-Se fomentará o bosamiento con tarxeta u atros meyos que priven o contauto fisico entre dispositivos, privando o dinero en efeutivo. Se limpiará y esinfeutará o datafono y o TPV dimpués de cada uso si ro emplegato que l’usó no ye sempre o mesmo.

-Puestos de trabajo compartius por más d’un treballador: se limpiará y desinfestará dimpués de cada uso, sobre tot ro mobiliario y tot aquello que se pueda manipoliar.

-Lavau y esinfezión regular d’uniformes u ropa de treballo que faiga servir o presonal seguntes o prozedimiento abitual.

-Se tirarán de traza segura os materials y equipos de protezión usato y se lavarán as mans tot contino.

Si amenestas más informazión u asistenzia:

delera@delera.eu / 618 52 92 66 (Pilar Villellas)