Una interpresa exeyana alquiere o Monesterio d’a Gloria de Casbas

15 Nov Una interpresa exeyana alquiere o Monesterio d’a Gloria de Casbas

A interpresa familiar PISIOSSE, d’Exeya d’os Caballers, dedicata a l’ostelería en edifizios istoricos reabilitaus, s’ha feito con o zenobio oszense drento d’o concurso d’a Fundazión PROGEA contando con l’asesoramiento y os servizios de DELERA

O zaguero 10 de noviembre se fazió a subastiella d’iste conchunto ordenata por o Chuzgau d’o Mercantil numero 2 de Zaragoza, resultando alchudicataria d’a mesma ra interpresa PISIOSSE S.C. O conchunto, con una superfizie edificata de poco menos de 10.000 m2 situau en una parzela de 29.000 m2, estió declarau Monimento Istorico-Artistico, de carauter nazional, por medio d’o Reyal Decreto de 16 de noviembre de 1979 d’o Menisterio de Cultura y o 16 de febrero de 2004 se completó a suya declarazión como Bien d’Intrés Cultural. Por tanto, ye sucheto a la lechislazión de protezión d’o Patrimonio Istorico d’a DChA.

O monesterio estió fundau en o sieglo XI y a suya farcha autual ye produto de diferens etapas construtivas que abarcan os sieglos XII a XVII. O suyo estau de conservazión cheneral ye pro pasadero, espezialmén grazias a la intervenzión sobre as cubiertas reyalizata en os pasaus años por a Fundación PROGEA, malas que, con a crisis enzetata en 2008 y a fallita d’o Grupo PROGEA s’eban entrerrompiu os treballos de recuperazión y conservazión que siguen estando nezesarios.

PISIOSSE ha estau en comunicazión permanén con o Conzello de Casbas dende o primer momento en que amostró o suyo intrés por iste monimento, podendo esponer a ra suya alcaldesa o suyo proyeuto pa lo mesmo una vez adquiriu, qui manifestó una favorable acullita. Asinas, entre os obchetivos de PISIOSSE ye lo d’ubrir un otel de libel dos u tres estrelas d’unas 25 u 30 cambras -adautatas a ra fesomía y destribuzión interior de l’edifizio istorico, sin d’alterazions estruturals, data a magnifica conservazión d’os suyos espazios interiors dica o sieglo XVII-, a creyazión d’una biblioteca y un zentro de dichitalizazión de fondos espezializau en Istoria meyeval, constituyiu por os fondos d’as bibliotecas de bels insignes profesors y catedraticos d’a Universidat de Zaragoza, aulas, salas de reunions y espazios multifunzionals pa autividaz culturals, sozials, interpresarials, ez., un espazio coworking y incobadora de proyeutos d’emprendimiento rural, un zentro d’informazión turistica y una botiga de ricuerdos y artesanía d’a zona. Tamién se preveye un posible uso residenzial u asistenzial pa mayors, de chicotas dimensions, seguntes os modelos de chestión y tratamiento innovadors adautaus a ra reyalidat d’as zonas rurals tasamén poblatas.

Todas istas autuazions se levarán a cabo baxo os siguiens prenzipios:

1. Preservazión y restituzión, en tot lo posible, de l’aspeuto orichinal d’o conchunto conforme a ras diferens epocas d’a suya construzión.
2. Programazión de ditas autuazions a curto, meyo y largo plazo pero mantenendo a continuidat d’as mesmas, sin d’entrerrompizions indebitas.
3. Mesa en valor y adecuazión d’as instalazions y iniziazión d’as autividaz propuestas que leven aparellatas a mida que queden en condizions d’uso inmeyato, sin adiar -d’estar posible- a suya iniziazión a aber completau o plan d’obras de reabilitazión.
4. Sostenibilidat economica y reinversión de parte d’os benefizios en o propio monesterio y as suyas autividaz publicas. Os usos lucrativos s’almeinistrarán por una soziedat mercantil con cualos benefizios se contrebuyirá tanto a la recuperazión y conservazión d’o complexo monastico como a ras autividaz sin animo de lucro que s’encomendarán a una fundazión espezificamén constituyita pa tal fin.
5. Sostenibilidat meyambiental: todas as autuazions a reyalizar buscarán en tot lo teunicamén posible, tratando-se d’un conchunto medieval, de millorar a efizienzia enerchetica, l’uso razional de l’augua y os recursos naturals, contrebuyir a ra transizión enerchetica y a ra luita cuentra o cambeo climatico.

DELERA, consultora espezializata en o refirme a proyeutos de desarrollo rural innovador y repoblador ha asesorau y asistiu a o suyo clién PISIOSSE a o largo de tot iste prozeso y se felizita por contrebuyir a recuperar y meter en valor iste proyeuto cultural, sozial y interpresarial en favor d’o patrimonio aragonés y o desarrollo d’o monezipio de Casbas de Uesca y de toda a Comarca d’a Hoya de Huesca – Plana de Uesca